Laot hijoe luah membentang
Dheh ta pandang buweh meudoda
Roe ie mata watee teubayang
Keu saboeh hiburan gadoeh di mata
Yoh masa dilee sideuh di gampoeng lon
Bak saboeh dusoen Ujoeng Manggeng nama
Aceh Barat Daya Kabupaten lon
Adat ngoen santoen mantoen meurasa
Asai na pesta ureung meuhudoem
Ikot meugaboeng meusuka ria
Hatee bahagia ureung lam gampoeng
Rakan ngoen kawoem katroeh teuka
Peulom acara meukawen sidara
Geupeugot pesta cukoep that hayee
Nyang dara-dara sibuk geuhias kama
Teuma nyang muda-muda geu peuget page
Nyang tuha-tuha dhuk meusapat
Gopnyan peuteupat adat lam gampoeng
Agam ngoen dara nyang dhuk rapat-rapat
Sigra geu peusyadat jeut bek meugaboeng
Lom peumanoe pucoek pih sabee na
Geumanyum tika ngoen on u muda
Boh “ bie luluk” teuma nyan nan benda
Geu pasoe lam ie tujueh boh tima
Oe leuh nyan teuma geureuthek ie on
Peunganten geupetroen geujhak peumanoe
Sinan ngoen judoe geu peuhimpon
Seulawet meualon keu peunganten baroe
Geupeudhuk sidara dua ngoen judoe
Ureung meuhatoe geulingka-lingka
Ucapan doa keupenganten baroe
Ladum na nyang roe ngoen ie mata
Tapi jinoe leuh kiban rupa
Lon ka dewasa hantoem na dheuh lee
Hoe keuh ka teuma nyan budaya
Peu keuh ka binasa atawa ka mate
Saleum
Etty Rismanita
Tidak ada komentar:
Posting Komentar