Bantai Meususoen

Mula lon kata ngon assalamualaikoem
Samboet salem lon wahe syedara
Dengoen ie mata hana pre ditroen
Peunawa jantoeng lon lempah dibungka

Wahe rakan kadang na teulansoeng
Ta peugah bak lon wahe syedara
Canden that dara ngon pipi meuleusoeng
Oh di senyum phon lage ureung india


Bule mata meukuwet areh meulengkoeng
Nyang keuh dara lon nyang ka dibungka
Si itam mameuh khen ureung gampoeng
Sijuek ban imbon oh di peugah haba

Dilanget manyang geulante meusamboeng
Ujeun pih di troen meutaga-taga
Jioh lon jak lon tinggai gampoeng
Niet lam hate lon jak mita dia

Kaleuh lon setot rata juroeng
Rata gampoeng kaleuh lon cuca
Pat na berita ulon cek lansoeng
Hate nyang rihon mita peunawa

Pat keuh gata e peunawa jantoeng
Tawoe bak ulon jinoe beusigra
Hate that subra ngon gundah lon tanggoeng
Gaseh bek ta peupuntong, sayang bek tatuka

Tagisa hai dek jinoe bak ulon
Sungeu hate lon meunyoe than gata
Peuratah gata ngon bantai meususoen
Mantoeng meusaroeng hana soe buka