Budaya Nyang Ka Meucroen

Dengoen Bismillah bareeh lon pupon
Assalamualikoem lon mula kata
Tanda geutanyoe meu adap ngon santoen
Jeureuneh bak imbon salem lon peuna

Haba lon gareh meutuleh ngon pucoek on
Keuneuk meuhimpoen ngon manduem syedara
Keunoe ulon jak ka lon tinggai juroeng
Niet lam hate lon jak mita saudara

Kaleuh lon lingke gunoeng meulamboeng
Uten bak aroen kaleuh lon cuca
Keunoe lon teuka ngon cae lon susoen
Tanda dari lon cinta budaya

Sayang biet sayang ujeun ka di troen
Basah padee lon dalam uroe kha
Sayang biet sayang jinoe keunanggroe lon
Budaya nyang phon jioeh meutuka

Budaya Aceh teulebeh meupantoen
Dari jameun phon ciet ka meumada
Wate bak pesta “peugah haba” khen ureung gampoeng
Peutuah geu alon lam cae irama

Di bineh pasi e bungoeng giri, meuriti bak aroen
Luroh sion-on e putroe imbon, but angen ba
Cae Aceh ka meu eleh dimata kawoem
Kiban ta peutroen keu geuneurasi bangsa?

Bek takhen dilee bareh cae nyang ka ditroen
Keu bahasa phon pih ka lee meutuka
Ka bahasa Indonesia kuta ngoen duson
Keu bahasa phoen hanjet le dibaca

Manyang – manyang rumoeh gudoeng
Lip diek troen u pucoek meunara
Budaya Aceh sayang ka meucu’t ujoeng
Ditiek dalam tong cok budaya lua

Budaya nyang teuka di sanjoeng-sanjoeng
Melanggar ngoen hukom soal biasa
Nyang penteng gaya peudeh bak kawoem
Nyoe keuh ulon aneuk Eropa

Bukoen lon bengeh wahe e imboen
Wareh ngon kawoem gampoeng ngon kota
Nyoe than peucaya jeut neu cek lansoeng
Bek na seleboeng haba peusuna

Maka nibak watenyoe ijin keuh ulon
Cae lon suson keubukti budaya
Bacut lon kisah cerita gampoeng lon
Sayang that untoeng sabe lam bala

Leumpah that sayang sibak bak niboeng
Lam rimba bakoeng soe hiroe hana
Rata desa yatim janda meuranggoeng
Ureung lam geudoeng teusenyum-seunyum saja

Hana meusagai teurasa untoeng
Dari jameun phoen sabe lam sengsara
Baroe na siat piyoh dalam bom
Leuh teukhen di peutroen le wali negara

Kaseup keuh oh noe cae dari lon
Sebagoe bukti phon lestari budaya
Meuah syedara kadang na teusinggong
Neu peumeuah lansoeng bek jeut meudosa

Guna bak trieng keu page reubong
Guna juroeng keu page tanaman
Tajak budayakan budaya meususoen
Cae ngon panton bek di croen le geulumbang

Bahpih nanggroe nyoe ka pernah di peuron
Nibak saboh thon le geulumbang raya
Tapi budaya bek sampe puntoeng
Sayang geunerasi lon singoh lon lusa

Nyang Ayah-Ayah wali lam gampoeng
Nyang caroeng meususoen atawa meuhaba
Syeh-syeh ternama nyang raja meususoen
Neuwariesie bak kawoem ileme nyang na