Seniman

Assalamualaikom wahe rakan
Nyoepat karangan lengoe wahe syadara
Pat na salah neupeugah rejang
Jeut lon tuan perbaiki sigra

Ujeun ditoeh hana dipirang
Ureung jak ublang meusen seumula
Wahe syedara neu leungoe reujang
Nyopat seniman dari Abdya

Kisah Wate Prang

Dengoe loen kisah nanggroe teungoeh prang
Watee talawan pasukan indonesia
Na nyaeng matee ladeom ngen pinsan
ladoem di buang lam laut raya

Di kamoe rakyat susah hanaban
ladoem rakan keunoeng senjata
ladoem di siksa sakeet hanaban
ladoem di cang'' dijoek keu meuruwa

Budaya Kafe

 Manoek mate sideuh dalam gle
Haroem mubee keunoe u desa
Jinoe budaya kahancoe reule
Budaya kafe tamoeng meudoeda

 

Menyoe but lagenyan hanpeu tapike
Payah thot hate ngon bara apui
Bak peusalah gop hana wate le
Jinoe ka akhe mandum lage bui

Jasa di Ayah

Assalamualiakoem e kumbang pade
Kumbang dalam gle goeh digisa
Deungoen saba ie mata dilee
Hate meurawe ingat keu jasa

Jasa nyang rayeuk hanjeut lon peuglah
Hanjeut lon balah wahee kakanda
Meunan keuh syedara jasa di Ayah
Hapoeh hapah mita beulanja

Oh uroe beungoeh langkah geubeuot
Oh uroe seupoet laju meugisa
Mita beulanja keu kamoe nyang dilikoet
Guruek teuot geulingke paya

Sayang That Untoeng

Di ateuh gle tapula lawang
Sideuh dalam blang pade tapula
Neu kaloen nyata wahe e cut bang
Bukon hai rakan lon ba peusuna

Timue ngon Barat kuta ngoen dusoen
Ie mata di troen han reda-reda
Nyang janda-janda aneuk geu ayoen
Sedeuh that untoeng si bunga desa

Neuk Meusapa

Assalamualikoem seubagoe peumbukaan
Saleum dari lon tuan keu manduem syedara
Bak binteuh sastra lon tuleuh karangan
Geulantoe lon kireum peusan keu rakan silingka

Neuk jak u blang jak kawe bace
Sayang bukoen le eumpeun tueh hana
Neuk sapa rakan lewat hape
Sayang bukoen le pulsa teuh hana

Nasiep Di Adoe

Assalamualaikoem sebagoe permulaan
Ngoen duablah tangan ateuh jeumala
Meuah teulake bak manduem rakan
Kadang nyoe karangan na salah haba

Teungoeh teu duk-duk meucureuh lam dada
Keuneuk meusapa manduem sinaroe
Hantroe jaroeh keunan lon jumpa
Lewat sastra ulon peu sampoe

Sapa Beungoeh

Assalamualaikoem rakan sinaroe
Nibak bunngoeh nyoe lon sapa gata
Dandang tamoeng sikula ulon troeh keunoe
Gata lon peugoe ngoen dua krak haba

Uroe jumat uroe nyang keramat
Uroe nyang mangat le pahala
Rame duem ureung dipileh uroe jumat
Peugoet acara sunat atawa pesta

Cae Beungoeh

Assalamualaikoem oh banta sedang
Meuah eu rakan ka teulat haba
Cukoep that lama hana kunjoengan
Bak fb rakan hana teu baca

Teuma jinoe peuna kabaran?
Peu gata rakan sehat-sehat saja
Teungoeh meusem ujeun neu jaga keusehatan
Bek gata rakan reubah lam tika

BEK PEUSABE KAI NGON ARE.

bukon le sayang bungong ban keumang
kahabeh karam meubuet ie jile
bukon lee sayang ureung islam
... kakaram iman hansoe pakoe le

adak na sidoroe sapat di tgk imum
han soe peuremeun meukuin lam tika
mari rakan lon rakan meutuah
tajak u meulasah beu tiep uroe masa

Jaga Budaya

Assalamualaikoem wareuh taulan
Nyoepat lon tuan jak samboeng haba
Ta meu calitra geutanyoe rakan
Inoeng ngoen agam tuha ngoen muda

Ubeut ngoen rayeuk, Aduen ngoen abang
Keubudayaan beuna tajaga
Ta useuha useek budayanyan
Bek sampe rakan di jak cuca

Tapileuh - Tapileuh

Tapileuh hai neuk tapileuh
Nyang hate puteuh lage saka
Asai bek rupa sagai nyang puteuh
Hate hana gleuh hana meuguna

Nyang tuloeng gata khon rupa nyang tari
Nyang teum peurati budi ngoen basa
Meunyoe nyang lagak gadoeh ngoen gincu bibi
Aneuk roet lam ie di turi hana

Siet Lahiet Lahoe

Siet lahiet lahoe,,Adoe oe siet lahit lahoe,,
Bek lee tameututo yang kon kon habaa
beu na neupike wahee teungku oe
Nanggroe ka hancoe gadoeh meudawa..

Dilee tamuprang rakan goh that meuhamboe
Jinoe ka hancoe rakan oe pulom takira
Meunyoe na neu sayang hai ureung meu atoe
Leubeh goet neu mundoe bekna lee haroeh haraa

Kisah Makwa Minah

foto internet

Cukoep that teulah jinoe di Makwa Minah karoeh geumeunikah  ngoen agam buya,  pike meu ubah oh leuh meunikah rupajieh meutamah parah lage nyang kaka.

Jinoe Makwa Minah cukoep that susah rata meunasah geujak kliek-klik droe, pikee keu lakoe lage penjajah beuda limoeng  blah ngoen awak Belanda

Pike hareta leu lam pangkee lampoeh teube pih  ata gala, geujak u kota ngon gaya Eropa moto geusewa payah meugade, oh deuh geukalon nyang dara-dara laju geu klep mata peukuwet misee.

Meah

Assalamualaikom adun adoe

Saleum dari ulonnyoe meuhat mileek gata

Peumeuah syedara salah lon bak meututoe

Bak meu atoe karoeh sakeut gata

Peumeuah bak rakan manduem seukawan

Salah lon tuan puetimang gata

Meuseungaja ngoen than, tuloeng neu maafkan

Bek na sangkotan ulon ngon gata

Sosah

Allah hai poe banta saidi

Bungoeng giri bak teungoh desa

Dua aneuk  nyan hana soe padoli

Ka yatim diri hana soe kira

Adak tajoek bak pemeurintah

Hudeup susah sinan bak asrama

Tapi luka mantoeng meudarah

Meunyoe goeh glah luka lam dada

Ie Mata Lakoe Ngon Aneuk Simata Wayang

Meu ie di la ot meu alon bicah
Lampucok lipah na ulat bangka
Sijuek ulon top hugop lon peuhah
Peusabab ulah dinda ta bungka

Ta keubah ulon wahe dek payong
Sinoe di gampong lam haro hara
Hanle ta ingat cinta dek payong
Tapeugah kelon hana setia

Sibungoeng Ramboet

Foto internet

Teuduk ulon bak bineh laot

Hate meubalot ingat keu gata

Dara lon cinta sibungoeng ramboet

Jinoe habeuh roet hana meuhoe ka

Ie mata dile sabe tiep seupot

Lage ujeun roet meutaga-taga

Sengue that rasa than na soe baloet

Wahee bungoeng ramboet hoe ta bungka

Le that bak aroen oh Dek eu di bineuh pasi

Lom jaloe meuriti bak bineh kuala

Sengkak lam dada teingat oh bungoeng melati

Watee tameunari  oh sepoi  teuka

Sibungoeng Ramboet

Teuduk ulon bak bineh laot

Hate meubalot ingat keu gata

Dara lon cinta sibungoeng ramboet

Jinoe habeuh roet hana meuhoe ka

Ie mata dile sabe tiep seupot

Lage ujeun roet meutaga-taga

Sengue that rasa than na soe baloet

Wahee bungoeng ramboet hoe ta bungka

Le that bak aroen oh Dek eu di bineuh pasi

Lom jaloe meuriti bak bineh kuala

Sengkak lam dada teingat oh bungoeng melati

Watee tameunari  oh sepoi  teuka

Senyum gata bie ban bulen purnama

Leumbot sapa  lagee  sang bidadari

Tapi kini hudep lon lam seupot buta

Oh bulen purnama  sampai that hati

Angen dipoet meusok lam hate

Sijuek bukon lee nyang ulon rasa

Sang-sang  dheh gata ulon talambee

Ku peuthoe lee, dudoe ka hana

Oh Dek mulu sibungoeng hate

Ek that meusampe ulon ta tinggai

Hana nyang laen didalam hate

Sibungoeng padee woe bak asai

Meugruem ie laot ulon teukeujot

Ie mata nyang roet teu the pih hana

Gata jak hana tangieng u likoet

Oh bungoeng ramboet  ulon kecewa

Saleum

Pantoen keu Kanda

Assalamualaikoem …

Paseung di laot bobah dalam blang

Cukoep that sayang ureueng meutani

Geukaloen padee teungoeh keumang

Keubit sayang matee meuriti

Meunan keuh hai Bang cinta lam hate

Adak neucungke han mate rasa

Tapi sayang keubit bukon lee

Harus ta meucre segohlom meubantai dua

Hasrat lon hai Bang neu meutunang

Hudeup lam naungan buboeng asmara

Hudep meusama susah ngoen seunang

Hendak sikafan matee dua

Ka ulon peugah bak boh hate sayang

Bek ngon lon tuan neu meukeuluarga

Ulon tinggai di nanggroe than aman

Uroe ngon malam hanjeut teunget mata

Lepah neu teunget meusiklep mata

Laju hareuta gadoeh meulayang

Adak ta behe droe hana meuguna

Keudeh lam penjara bak jeruji hitam

Adak tajak u gle neuk jak pula pisang

Takoet than neuriwang keuno bak dinda

Adak pih neugisa hana lee saban

Nyawoeng lam badan ka than le na

Ka meunoe keuh nasiep lam nanggroe dinda

Ayah ngoen ma beda tujuan

Hale haram hana mandeum kasama

Di meu lomba-lomba reuboet keukuasaan

Leupah that sayang sikrak leumang

Hana pah santan meu kete’t rasa

Nyoe keuh panton keu kanda lon layang

Geulantoe alasan lon jaweb haba

Kaseup kueh oh noe cerita lon karang

Ceurita hiburan bak malam jula

Peuemuah sigra oh han pah rumbang

Sebab lon tuan hana biasa

Singoeh watee tasamboeng lagi

Masalah meurawi han peu neutakoet

Oh pantone neu taot neu boeh biodata diri

Tanda na nyang miliki bek sampee dicok le gop

Saleum

Banda Aceh

Derita Bungong Jie Keubah Le Kumbang

Adak hana watee hai rakan meutuah

Ulon seu leu ah tamong bingkai sastra

Menyoe kajeut keungon payah taleupah

Meunan geupeugah le ureung tuha

Bak pisang wak timoh bineh kruen
Timoh lam naleung tansoe usaha
Seutia payah lon pula bongong
Oh wate keumang ka gob po atra

Yoh wate ubeut hana soe tanyong
Pakon oh keumang kembang troh teuka
jijak peulaloe akan bungong nyan
Ohka laye bungong jie tinggai teuma

Setia payah lon tambak leu hop
Bungong babah rhot kagop po atra
Adak lon tupeu nasib lage nyan
Bongong lam taman han lon bie mala

Meunan keuh nasib di kah bungong
Oh ka layee bak keumang kumbang ji bungka
Talake do,a ubak hazarat
Bek lam meularat hudep di donya

Ya ilahi ya Po Tuhan Lon
Neubi bongong lon bek roh teurana
Beu panyang umu mudah raseuki
Neubri ya Rabbi beu ampon Dosa

Beu gepue meu ah poma ngon ayah
Seubab lon ilah perintah gob nyan dua
Jinoe tuboh lon dalam penderitaan
Si kumbang jantan ji kubah hamba

Ji kubah ulon ji mita yang laen
Cut bungaong canden si ceudah rupa
Ji kubah boh u jicok boh mamplam
Jiteik lontuan lam hate duka

Oh lon meulahe dalam penderitaan
Aneuk lon sonsang payah keu luwa
Lon ba bak tabib lon you seuleusoh
Gobnyan meu tanggoh dua hari tiga

Penderitaan lonmeu tamah tamah
Hate lam gundah tiep2 ku tika
Oh tae digob cit saboh macam
Ta eue lon tuan suami hana

Meunan keuh sabe udep lon tuan
Han soe lee pakoe si suntok masa
Beu bagah lahe aneuk meu tuah
Geulantoe ayah oh rayek gata

Tabeh peurangui lage buet ayah
Lakeu bak Allah teip uroe masa
Bu bek nale akai kumbang nya
Neubri ya Rahman aman sentosa

Adak lon mita bungong lam taman
Akai kumbang durjanam bek lee meu gisa
Beu neubri keu aneu lon akai yang ceudah
Neubri ya Allah beu samporeuna AMIN

Saleum

Top of Form

Bottom of Form

Hudeup Meumadue

 Simangat-mangat kuah bôh labu

Meunyôe ta taguen hana meusira

Simangat-mangat hudeup meumadue

Pasti na karu sigôe-gôe na

Paneu na mungken dua bôh jalöe

Di peutajoe lè  drôe pawang

Ka teuntèe mueplang nyan jalöe

Adak göt geu atöe hana ciet seuimbang

Leupah that sayang keu sabôeh timphan

Diateuh talam rhô meutabue

Hana hudeup seunang hana pajan

Sabée tiep malam teuka cemburu

Tapula panjôe disampeung rumôh

Na teumpat teudoh watee uroe kha

Adak ngoen doa keunoeng pröeh

Krèh krôh lam rumôh teutap na

Saleum

Etty Rismanita