Seniman

Assalamualaikom wahe rakan
Nyoepat karangan lengoe wahe syadara
Pat na salah neupeugah rejang
Jeut lon tuan perbaiki sigra

Ujeun ditoeh hana dipirang
Ureung jak ublang meusen seumula
Wahe syedara neu leungoe reujang
Nyopat seniman dari Abdya

Bak malam senin ku tuleuh lagu
Irama meujampu Melayu India
Bak malam selasa lon baca laju
Bak malam rabu peucocok nada

Bak malam kamis gitar lon tarek
Senar lon peteuk  cukoep meumada
Hana terasa kahabeuh lireuk
Mantoeng meuaseek teuma kepala

Bak malam jumat lon mula teulat
Sebab lon peuteupat nibak Aleh Ba
Bek singoeh meuraba ulon di akhirat
Meu saboeh ayat ka hanjeut teu baca

Laju lon lanjoet bak malam saptu
Bak malam minggu lon ulang teuma
Meuah syedara lupa lon beritahu
Judul lagu nakeuh “Jatoeh Cinta”

Meunan keuh rakan cerita lon tuan
Bak keumarang ciet nomboi sa
Tapi jinoe na saboeh soalan
Lagu lon karang hana seumpurna

Allah hu Tuhan kiban ku paban
Di ulon tuan hanjet ku peteuk gitar
Sebab guke panyang kiri ngoen kanan
Siat-at hai rakan ka putoeh senar

Meunyoe keu guke cukoep lon sayang
Jeut putoeh cut abang daripada putoeh guke
Wahe gure peumeuah reujang
Niet jeut keu seniman di ulon han ek le