Ie Mata Lakoe Ngon Aneuk Simata Wayang

Meu ie di la ot meu alon bicah
Lampucok lipah na ulat bangka
Sijuek ulon top hugop lon peuhah
Peusabab ulah dinda ta bungka

Ta keubah ulon wahe dek payong
Sinoe di gampong lam haro hara
Hanle ta ingat cinta dek payong
Tapeugah kelon hana setia

Menyona gata hay bungong sitahon
Sijuek hate lon watee lon rasa
Susah ngon seunang na gata dek bungong
Rasa terkenang lon eh lam istana

Jinoe hana le gaseh ngon sayang
Tinggai lon tuan sidroe meurana
Tiep uroe sabe hate lam susah
Cut bungong ceudah tatinggai kanda

Pakon keuh sampe hate lon ta peu gundah
Pue keuh na salah ulon ngon dinda
Meunyoe han tatung bek tamita ilah
Gadoh afuah dalam keluarga

Meuredok di gle si ujeun meugedum
Hanyot taloe krueng si cabeng geulima
Sideh peu leubeh sinoe pue kureung
Pakon dek buleun gata ta bungka

Ta tinggai ulon sinoe lam rango
Tabe lon manoe deungon ie mata
Badan lon pijuet awoh ngon badan
Terbayang bayang wajah adinda

Tatinggai ngon aneuk simata wayang
Sayang that sayang sabe hoi poma
Jie meuhoi dinda sabe tiep malam
Tanyong bak ayah ho geujak bunda

Han jeut lon jaweub hai dinda sayang
Kareuna lon tuan lon tuho hana
Hana lon tuho hana gerangan
Tajak oh malam lam seupot buta

Pakiban cara lon bri bayangan
Keu aneuk badan si ayeum mata
Meunyo ta geseh dengon ta sayang
Tawow beu rijang saweu anek da